أستاذ علم النفس بعين شمس يتحدث عن المذيعات المنفسنات ويوجه رسالة لمتابعيهن
قال الدكتور فتحي الشرقاوي الأستاذ علم النفس بجامعة عين شمس، "إن المذيعات المنفسنات صنف جديد، بدأ يغزو الأسواق حاليا واللي عاوزة شهرة بسرعة الصاروخ، تنضم لهذا الصنف ألف باء دور المذيع في منظومة العمل الإعلامي البرامجي، يتبلور دوره الرئيسي في محاورة الضيف المستهدف بحلقة البرنامج بغرض نقل أكبر كم وكيف ممكن من معلوماته المتخصصة ورؤاه وأفكاره واتجاهاته للقطاع العريض من المستهدفين".
وأضاف أستاذ علم النفس بجامعة عين شمس، قائلا "المذيعة في سبيل تحقيق ذلك الهدف الإعلامي السامي لابد أن تكون على درجة عالية من الثقافة من حيث التنوع والشمولية والعمق، وأن يكون لديها كذلك المهارات اللازمة لإدارة الحوار والاقناع والتواصل ومش كده وبس وهيئة ومظهر وشكل وتعبيرات وجهية وجسدية معبرة ومناسبة حتى يتسنى لها في النهاية الخروج بأكبر قدر ممكن من الإفادة للمتابعين لها معلوماتيا ومعرفيا وثقافيا وإنسانيا".
وتابع الشرقاوي، قائلا "لكن مايحدث الأن مهزلة بكل معاني الكلمة، حاجة كده تخرج عن كل الأعراف وللأسف أساتذة الإعلام لم يطالعونا حتى الان برأيهم في تلك الظاهرة التي بدأت في المد والتنامي والمصيبة أنه مفيش حد استرعى نظره الموضوع ده، هتقولولي مالك.. في ايه؟، أقولكم، مذيعة بتطلع في أحد البرامج قال ايه، بتحل وبترشد مشاكل البنات والسيدات".
وأوضح،
قائلا "فجاة وهى بتعرض المشكلة تلاقي المذيعة دي تحولت وبقت الست الخضراء
نسبة إلى الرجل الأخضرالخارق المتحول وهاتك يا انفعال وشويه تبدأ الشرشحة والصوت
العالي، وبعدها صوتها يعلى ويعلي والتشويح بأيدها يشتغل وبؤبق عينيها ينور كأنها
آمنا الغولة اللي بيخوفوا بيها العيال".
واستكمل "فجاة تلاقيها خدت قرار أو حل جذري رهيب، أوعي ترجعي لجوزك، احنا الستات ممكن نعيش من غير رجالة، خلي عندك كرامة وماتكلمهوش، وخدوا من الهري والفتي ده طول الحلقة، قرارات مصيرية صادمة غير دقيقة وغير مدروسة، مين اللي سمح للمذيعة دي تعمل كده".
وقال أستاذ علم النفس بجامعة عين شمس، "الغريب أن المذيعة الخارقة، وهى بتفتي في المشكلات الأسرية، ماعندهاش أي معلومات دقيقة عن سمات وخصائص اللي أرسل الرسالة ولا اي معلومات عن المشكو في حقه ولا عن مقدمات تكوين المشكلة عبر التفاعلات الإنسانية السابقة وبعدين تدعي حضرتها أنها أم العوريف".
وأوضح، قائلا "سيبوكم من كل ده أنا معرفش المذيعة تخصصها الدقيق ايه كمان أهم حاجة دلوقت أن الصورة الذهنية اللي ممكن تترجم في ذهن أي حد بيتابع المذيعة أنها مش قاعدة في برنامج له قواعده وأصوله المهنية لأ دي حد قاعد على طبلية في فسحة كبيرة في أحد الأحياء الشعبية ونازلة نخع وتهديد ووعيد كأنها بتتكلم عن نفسها في صورة ملايين البنات والستات".
واختتم الشرقاوي، قائلا "مفيش حد عاقل ياجماعة من المسؤولين عن البرنامج عندها يلفت نظرها أننا محتاجين ثقافة نفسية سلوكية، مش محتاجين واحدة تطلع تربينا وتشخط فينا كأننا أطفال صغار فاقدين الأهلية ولا أهم حاجة عندكم نسبة وكثافة المشاهدة وزيادة العروش والكروش والله ده حرام".
