أستاذ علم النفس بعين شمس: متصدقوش يابنات

قال الدكتور فتحي الشرقاوي الأستاذ علم النفس بجامعة عين شمس، "كلاكيت تاني مرة، يادوبك البت لسه متجوزة، ويمكن الحناء ماراحتش من أيديها، وعاملة نفسها خبيرة في عالم الأزواج والزوجات، وتلاقيها قاعدة وسط صاحبتها اللي لسه متجوزوش ونازلة ندب وبتشتكي من الجواز وسنينه كأنها والية عندها 100 سنة ومخلفة أورطة عيال".

وأضاف الشرقاوي، قائلا "البت نسيت نفسها لما جالها انيميا البحر المتوسط، علشان عادلها وجوازها اتأخر شوية وتفضل تنخع وتتمنى ترجع بنت زي ما كانت، لا هم ولا غم.. إلى آخر السيمفونية الزفتية اللي طول النهار عماله تعزفها وهى أصلا فاشلة وبترمي خيبتها على غيرها، وكأن الجواز هو السبب مش هى، إلى المتزوجات حديثا وحتى قديماً أتحدث".

وتابع أستاذ علم النفس بجامعة عين شمس، قائلا "ياريت ياستات يافاشلات، تغيروا شوية من أسلوبكن المستفز في الكلام عن الجواز والمتجوزين، قدام البنات اللي لسه متجوزوش، يعني مش معقول كل ماتقعدي مع بنت، تطلعي كل العبر في الجواز والمتجوزين، إيه ذنبها البنت المسكينة اللي كلها أمل في الجواز، إنها تسمع منك المآسي دي كلها".

واستكمل، قائلا "معقول مفيش مفيش عندك كزوجة حاجة واحدة حلوة ممكن تقوليها وتشجيعها، كله غم ونكد وقرف وغسيل وطبخ وتنضيف وترويق، حتى لو افترضنا ياستي إن حياتك كده، ليه بتعتبري أن كل البنات اللي بيسمعوكي، ظروفهن هتبفى فاشلة زيك، ياريت تعصري على نفسك ليمونة ياحبيبتي وأنت بتتكلمي معهن".

وأوضح أستاذ علم النفس بجامعة عين شمس، قائلا "دول لسه بنات صغيرات، ماتكسريش بقلب البنات دي عندك كلمة حلوة قوليها، ماعندكيش يبقى تسكتي وتحطي كمان لسانك في بؤقك، وتخرسي خالص خالص تنصحيها أيوه، تخوفيها وترعبيها من الجواز لأ، ده كأس، الكل هيشربه هيشربه ممكن يطلع عندك جفا، ولكن ممكن يطلع عند غيرك شهد وهنا مش كده ولا إيه يا صفرا يا عقربة يا معرقبة".

وقال الشرقاوي، "بدل ما أنتي نازلة فتي وهري على الفاضي والمليان، ياريت تروحي تحضري الغدا لجوزك، وتعمليله طبق أوملت وشوية بطاطس محمره، وبعدها ادوشينا وصدعينا على الفيس، إنك تعبتي في تحضير غداء المحروس جوزك".

ووجه أستاذ علم النفس بجامعة عين شمس، حديثة للبنات، قائلا "الكلمة للبنات الصغيرات اللي على وش جواز، لما عقربة منهن تقولك الكلمتين دول، قوليلها طيب يا إخوتي لما الجواز وحش كده إنتي قاعدة لسه مع جوزك وفي بيتك ليه!؟، والعيل اللي بيجري حواليك ده واللي في بطنك ده كمان بيقولوا ايه عن الجواز لسه وحش بردو!؟، كش ملك.. مات".