أستاذ علم نفس: "هناك نوعين من الزعل الاستراتيجي مابنخدش بالنا منهم"

أوضح الدكتور فتحي الشرقاوي أستاذ علم النفس بجامعة عين شمس، أن هناك نوعين من الزعل الاستراتيجي معظم الناس لا تأخد بالها منهم، قائلا "مش كل زعل معناه أنك ضايقتني واتخانقنا وابتعدنا وسيبنا بعض لأ، في نوعين من الزعل الاستراتيجي معظمنا مابياخدش باله منهم لان النوعين دول من الزعل محتاجين شوية فهم على حبتين استنتاج وتأمل وبعضنا للأسف معندوش المهارات دي خالص".

وأضاف الشرقاوي، قائلا "في زعل معناه انك مش مهتم بيا وأنت مش واخد بالك مني وعلشان الفت نظرك ليا أعمل أني زعلان منك على اتفه سبب تقوم أنت بعدها تيجي تقرب مني وتطيب خاطري وتهتم بيا، وعلشان احنا مش مدربين على التعامل مع النوع ده من الزعل بنفضل نجادل ونزعل أكتر وأكتر ونستخف بمبررات زعل اللي قدامنا، ونتهمه بأن مبررات زعله هايفه وتافهه وغير حقيقية وساعتها تبقى المشكلة مشكلتين، عارفين كيفية التعامل مع النوع ده من الزعل ازاي؟، شوية طبطبه واحتواء وحنية وحبتين نحنحه".

واستكمل الشرقاوي، قائلا "وفي زعل معناه أنا غلطان في حقك فعلا وبدل ما أسيبك تزعل مني أعمل أنا فيها اللي زعلان منك علشان أهرب من لومك وعتابك ويمكن عقابك النوع ده عاوز منك أنك تقول للي قدامك برغم أنك زعلتني وأنت عارف كده كويس لكن أنا مسامحك ومش زعلان منك لأنك حبيبي وقريب مني بكده تكون احرجته وكشفته واحتفظت في نفس الوقت بإدانته قدام نفسه".