أستاذ علم نفس: "عدم اكتمال سعادتك سببها الناس البومة اللي في حياتك"

أوضح الدكتور فتحي الشرقاوي أستاذ علم النفس بجامعة عين شمس، أن من أسباب عدم الشعر بالسعادة وجود أشخاص بحياتنا يمتلكها الاكتئاب والتشاؤم، قائلا "ليه مابنعرفش نفرح، عارفين امتى الواحد بيبقى سعيد وفرحان بجد لما بيلاقي الناس اللي حواليه والمفروض أنهم حبايبه مبسوطين وفرحانين بيه وله، ساعتها بس بتنعكس فرحتهم عليه ويبدأ يشعر بالسعادة الحقيقية".

وأضاف الشرقاوي، قائلا "اديك مثال، افترض أنك أول واحد تعرف أنك نجحت بتفوق عارف سعادتك بنفسك ممكن يبقى مقدارها قد ايه تقريبا 25% سعادة هتقولي أومال البقيه التانية 75% من السعادة راحت فين؟، أقولك أول ماتشوف الناس اللي بتحبهم واللي حواليك وجنبك بدأوا يفرحوا ويسعدوا لفرحك اذا السعادة الحقيقة في سعادة غيرك لسعادتك".

وأوضح الشرقاوي، قائلا "عرفتم دلوقتي احنا ليه مابنعرفش نعيش لحظات السعادة لان معظم اللي حوالينا عاملين زي البومة، ننجح مهما ننجح ونحقق انجازات مهما نحقق وتلاقي وشوشهم زي الحيطة لا ابتسامة لا مباركة لا تهنئة لا مشاركة لا مساندة ووشوشهم زي الخشب والبلاستك".

وتابع الشرقاوي، قائلا "طيب بالذمة قولولي ازاي هنشعر بالسعادة ومعظم اللي حوالينا الإكتئاب والسواد والتشاؤم ضارب فيهم من رأسهم لرجليهم!؟"، مضيفا "علشان كده الزوج اللي بيفرح لفرح مراته يعتبر زوج رزق، والزوجة اللي بتسعد لسعادة جوزها تعتبر زوجة رزق، والأب والأم اللي بيفرحوا لأولادهم وبناتهم  رزق، ما دون ذلك بووووم، مفيش وراهم غير النعيق بس، أهي دي بقى اللي بيقولوا عليها دي عيشة تقصر العمر".