أستاذ علم نفس: "الناس الشقيانة اللي بتحلم هم الخيبة نفسها"

قال الدكتور فتحي الشرقاوي أستاذ علم النفس بجامعة عين شمس، إن هناك نمط من الناس طول عمره شقيان وتعبان بيطمح وبيحلم كتير قوي لكن للأسف مابيعملش أي إنجاز غير أنه يحلم ويقوم من الحلم علشان يحلم ويحلم بس، مضيفا "سرحان وتايه مع نفسه طول الوقت لدرجة أنه بيبقى مش دريان باللي بيحصل جنبه ومعاه وعلى طول بيفكر في حلمه وازاي هيعمله وهيتحقق وازاي كمان هو مبسوط وسعيد بيه".

 

وأضاف الشرقاوي، "المشكلة أن كل ده بيحصل جواه ومع نفسه بس وأول مابيصحى من سرحانه وأوهامه دي بيلاقي نفسه واقع على جدور رقبته وأن كل سعادته في الحلم تحولت إلى تعاسه في واقعة، وأنه لسه قاعد في مربع الصفر لا إنجاز فعلي تحقق ولا طموح حقيقي اتنفذ".

 

واستكمل الشرقاوي، قائلا "الناس دي أول مابتفوق من أوهامها وبتلاقي نفسها ماعملتش أي حاجة في أي حاجة وبيكتشفوا الحقيقة المره أنهم خيبانين ويمكن هم الخيبة نفسها وأن كل الناس اللي حواليهم بيتحركوا وهم محلك سر، بيجيلهم مشاعر إحباط رهيبة ممكن تدفعهم لتدمير نفسهم والاحساس ده بيخليهم يسافروا للعالم اللي ممكن بيخليهم سعداء ومبسوطين فيه".

 

عارفين العالم ده فين جواهم بس مع أوهامهم وخيالاتهم داخل أسوار كهوفهم اللي جواهم بس وكل ما فترة وجودهم جوه نفسهم طالت وزادت كل ما إحساسهم بالمرارة زاد علشان كده ياريت تخلي حلمك قصير وفعلك وتنفيذك له طويل لانك لو عملت العكس ممكن حلاوة الحلم تأخدك وتشدك وماتعرفش ترجع لأصل حلمك تاني ساعتها بس هتحس وتشعر إنك أنت مابقتش أنت لان كل اللي حواليك اتغير الا أنت وده في حد ذاته شعور أشد مرارة وممكن يدمرك تماما".