أستاذ علم نفس: أثبت وخليك زي الوتد وواجه مخاوفك

أوضح الدكتور فتحي الشرقاوي أستاذ علم النفس بجامعة عين شمس، أن هناك موضوعات في حياتنا كل مابنسيبها من غير مواجهة كل ما آثارها السيئة بتزيد وتكتر لدرجة أنها بتبقى في لحظة ما مزمنة ويصبح حلها محتاج منك تضحيات أكبر من قدرتك أنك تقدمها.

وأضاف الشرقاوي، قائلا "زي الحب من طرف واحد والميئوس منه، زي الخيانات بأنواعها، زي العقوق بأنواعه، علشان كده مفيش حل للموضوعات دي غير مواجهتها فورا وعدم المماطلة والأبطاء فيها"، مضيفا "اقطع عرق وسيح الدم ما تقولش مماطلة، وعلى فكرة أول ماتواجه الموضوعات دي وتحسمها وتخلص من إعباءها هاتحس بألم وتوتر ووجع رهيب ممكن يعصف بكيانك".

وتابع الشرقاوي، قائلا "بس أثبت وخليك زي الوتد لأن قمة إحساسك بالألم ده معناه أنك فتحت أول الطريق لراحتك والتخلص من معاناتك ووجعك"، مضيفا "صدقني الجبل اللي كنت شايله على ضهرك من الهم والغم هتلاقيه بيخف ويقل ويتلاشى شوية شوية كل ما قدرت تقرب من ألمك وقدرت تمسكه وتعيشه للحظات كل ماقربت من الشفاء والراحة والتخلص من وجعك، يارب نفهم خلص تخلص".