بعد تعرضها للتنمر.. إعلامية:"مش هخبي أولادي ويارب أفرح بيهم"

نشرت الإعلامية دعاء فاروق، عبر حسابها الشخصي على موقع "انستجرام" صورة تجمعها بأولادها، حيث جاءت بعض التعليقات غير اللائقة من متابعيها ومهاجمة ابنتها بسبب إرتدائها "بنطلون مقطع"، وأنها لا ترتدي الحجاب مثل والدتها، كما تنمر البعض على أولادها مؤكدين أنهم لا يشبهونها في الجمال.

وقامت "فاروق" فوراً بوضع تعديل على الصورة وكتبت عليها: "من فضلكم بمنتهى الأدب والأخلاق اللي في الدنيا، ممنوع منعاً باتاً التعليق على لبس أي حد من ولادي ولا شكلهم ولا حلوين ولا وحشين ولا شبهي ولا مش شبهي".

وأكدت أنها وضعت تلك الصورة من أجل تسجيل اللحظة، وأن من يقوم بالدعاء لأولادي فلكم بالمثل، ويجب ألا يتدخل أحد بالتعليق على ملابس أولادي أو أشكالهم.

وتابعت الإعلامية:" إذا هتدعولهم ربنا يكرمكم ويبارك لكم في أولادكم ولكم بالمثل إنما كل حد يدخل ينظر علي ولادى وعلي لبسهم ده مش مقبول، انا حرة احط صور ولادى علي صفحتي للذكري ولتسجيل اللحظة انما مش من حق مخلوق يدخل يناقشني في شكلهم او لبسهم وبعد إذن حضراتكم اللي كاتبه أو كاتب تعليق من هذا القبيل يدخل يمسحه بهدوء لان اي تعليق من هذا القبيل هعمل بلوك فورا ولكم مطلق الحرية انكم تعملوا انفولو للأكونت بتاعي".

استكملت تعليقها بالرد علي متابعيها: "محدش بيستحمل على عياله الهفوه، وأنا مش بستحمل، ربوا عيالكم انتو بالطريقة اللي تحبوها ومالكوش دعوة بعيال حد تاني حتي لو عيال أختك شكراً".

وردت الإعلامية دعاء فاروق، علي تنمر متابعيها علي ملابس ابنتها وشكل أولادها من خلال مداخلة هاتفية لها:" أنا بتصور مع بنتي عادي، فبلاقي الناس داخله في الموضوع بشكل غريب، أنا مش هخبي ولادي، أنا ولادي معايا في كل المناسبات، من حقهم عليا انهم يتصوروا مع أمهم أفرح بيهم وهما يفرحوا بيا، وأسجل ذكريتنا مع بعض، أنا مبعملش حاجه غريبة، بعذ الناس دخلت انتقدت اني بنتي مش محجبة، أنا بنتي لسه تمه 15 سنه".

وتابعت:" بنتي محترمة ومتربية وكيوت، واللي تلبسه هي حره فيه، في خط أحمر علي ولادي، اتكلموا عليا انا وعلى لبسي، ممنوع حد ينطق كلمه علي ولادي ولا علي شكلهم او لبسهم، مش انا اللي مقطعالهم البناطيل دي والله، هي المحلات مبقتش تبيع غير البناطيل المقطعة".

وأضافت:"شرعاً أنت متدخلش فيما لايعنيك، ولادي بيضايقوا من الهجوم ده، عيب بجد اللي بيحصل ده، انتقدوا فقراتي اللي بقدمها، لكن حياتي الشخصية محدش ل يه دعوه بيها ومرفوض حد يتكلم عنها، أنا ليا مطلق الحرية أتصور مع أولادي، وأنا مش هخبي أولادي ويارب أفرح بيهم".