بطلة مشهد إنقاذ طفلة المعادي ترصد تفاصيل واقعة التحرش

قالت أوجيني أسامة بطلة مشهد إنقاذ طفلة المعادى: "لما شاف الكاميرا  جري على طول بسرعة.. أنا بشتغل في معمل تحاليل كنت في "ريسبشن" المعمل وشفت الموقف قدامي وكانت زميلتي في الغرفة  الداخلية وأول ماشفت الموقف خرجت وهي جت ورايا".

وتابعت في مداخلة أخرى مع الإعلامية لميس الحديدى ببرنامج كلمة أخيرة على قناة ON: "وقتها ماجاش حاجة في بالي غير الرهبة والخوف والموقف اللي كانت فيه البنت والحالة النفسية اللي ممكن تتعرضلها ومستقبلها كل الأفكار دي جت في بالي وأنا بفتح الباب عشان أنقذها".

وكشفت "أوجيني"، أنها أم ولديها ابناء أكبر من الطفلة المتحرش بها في الفيديو، قائلة: "ماستحملتش المنظر عشان تخيلت بنتي مكانها والأحداث كلها تمت في لحظة  فتحت الباب وواجهته ولم أتردد لثانية واحدة في إيقافه ولم أتررد أن أبث الفيديو على السوشيال ميديا.. ربنا كان عاوز ينقذ الطفلة دي واتحركت بمشاعري مش بعقلي ومافكرتش لحظة واحدة وتعاملت بلتقائية، وأنا عندي بنت زيها وقلت أكيد ربنا هيوقف اللي عملته  لاولادي لأني بنقذ أطفال وبنات أخريات".

واستكملت: "البنت كانت مرعوبة وأول مافتحت الباب هربت منه.. الطفلة دي بتبيع مناديل برفقة أسرتها  في شارع مجاور وشفتها قبل كده مرة أو مرتين وعارفها بتبقى دائماً واقفة في ميدان الحرية".

وأوضحت "أوجيني"، أنها لم تكن مهتمه بالسوشيال في حياتها العادية  لكنها قررت بث الفيديو بنية الوصول للمتحرش والقبض عليه، قائلة: " لم أكن أتخيل سرعة انتشار الفيديو وضبط الرجل.. وأنا ماعنديش متابعين  كتير على الفيسبوك غير أصحابي وقرايبي.. وبمجرد وصولي للبيت لقيت قسم المعادي بيكلمني، ولحد الصبح بيتواصل معانا واليوم كله بيدوروا على المتهم لحد ما قبضوا عليه ".

وأضافت: "أنا ماعرفش استدرجها إزاي؟"، وفي تعليقها على تعليقات بعض رواد السوشيال ميديا المهاجمين لنشرها للفيديو قالت: "شفت كافة التعليقات لكن أنا مقتنعة أنه عمله كذا مرة وربنا رفع ستره من عليه وده تدبير ربنا عشان يفضحه وينقذ بقية الأطفال".

ونفت "أوجيني" أن يكون صاحب المعمل قد ضغط عليها لعدم نشر الفيديو قائلة: "بالعكس شجعني من أول لحظة رفع الفيديو  وقالي اللي أنتي شايفاه  مناسب جواكي اعمليه عشان ضميرك يستريح لأن ربنا كتبله يتفضح هنا، وأنا مستغربة من اللي اتقال أنه ضغط عليا".