والدة طفلة المعادي: «عاوزة حق بنتي حاسة إني في حلم »

«عاوزة حق بنتي».. بهذه الكلمات تحدثت عبير نبيل، والدة «طفلة المعادي»، التي تعرضت للتحرش على يد أحد الاشخاص داخل أحد العقارات بمنطقة حي المعادي.

فقالت «عبير» إن زوجها «أصم» ويعمل سايس بمنطقة المعادي، كما أن عمله غير منتظم، مضيفة: «زوجي بيشتغل يوم آه وعشرة لا، هو شغال سايس في المعادي، وبنتي في اليوم ده كانت أول مرة تنزل فيه مع أبوها».

وتابعت والدة طفلة المعادي خلال حوارها في برنامج «يحدث في مصر»، مع الإعلامي شريف عامر، على شاشة «MBC مصر»: «بنتي متعلقة بشكل كبير بوالدها، أنا عندي 6 عيال بيحبوا أبوهم أوي، ومتعلقين بيه، حتى كمان بيحبوه أكتر مني، أبوهم بيروح الشغل في منطقة المعادي، ببعت معاه سيف ومحمد ولادي عشان لو أبوهم حد اتخانق معاه يكملوني، إنما العيلة دي أول مرة تروح معاه الصراحة».

وأشارت والدة الفتاة، إلى أنها يوم الواقعة كانت تجهز الطعام لأبنائها، قائلة: « لاقيت محمد بيقولي أنا رايح لبابا قولتله طيب يا حبيبي، بدور على العيال الصغيرة التانية ملقيتش البنت الصغيرة لحد ما جالي تليفون من واحد ظابط من قسم المعادي قالي انتي مرات سيد، قولتله اه».

وتابعت: «الظابط قالي عاوزك إنتي وسيد، قولتله فيه حاجة قالي لا ومقاليش على الواقعة، سيد خد بعضه وراح، يارا لاقيتها كانت جاية تجري، وقالتلي الراجل قالي تعالى ورايا ودخلنى في حتة كدة وكان  عاوز يعملي حاجات وحشة، لاقيت واحدة بتقوله بتعمل إيه، أول ما بص ليها قمت شديت إيدي منه وقعدت أعيط وأجري»، موضحة أن ابنتها لم تروى لها ما حدث ليلة الواقعة، ولم تسرد لها الواقعة إلا عندما سألتها عنها، «البت كويسة الحمد لله وبتتكلم معايا بس بتتكسف تتكلم مع أي حد تاني، شوفته في النيابة بس قالولي ملكيش دعوة بيه».

واستكملت الام حديثها: « أنا حاسة إني في حلم أول مرة أصحى منه، دي عندها 7 سنوات، حد يبص لواحدة عندها 7 سنوات، إزاي!، هو مش عنده ولاد ولا أحفاد؟».