عصام الحضري: رحيلي عن الأهلي غلطة وندمان عليها

رد عصام الحضري، مدرب حراس المنتخب الأوليمبي السابق، على تصريحات زكي عبد الفتاح مدرب حراس المنتخب السابق والتي وصف إسناد تدريب حراس المنتخب للحضري بـ "التهريج".

وقال الحضري في مقابلة مع برنامج "حبر سري" المذاع على قناة "القاهرة والناس": "وجهة نظر الكابتن زكي؛ وهو قبل كده من فترة كان في خلاف بيني وبينه وخلاف زي ما يكون في منافسة في حتة اللاعيبة ويمكن هو قال كده واحنا في بينا خلاف".

وأضاف: "لما أتصالحنا معادش في حاجة بتتقال؛ أحنا في مجال كرة القدم وفيه منافسات كتيرة؛ مدربين ولاعيبة وحراس وهو مجال صعب التعامل فيه ومليان مشاكل ولو أنت مش قوي هتتاكل فيه؛ سهل أن أطلع وأتكلم ولكن لما اطلع وأقول معلومة بتبقى مظبوطة".

وتابع: "أنا أخدت شهادات تدريب من الاتحاد الأسيوي لأن شهادات الاتحاد الافريقي مش معتمدة في أسيا؛ شهادات المدربين المصريين الافريقية مش معتمدة؛ الكابتن حسن شحاتة والكابتن أيمن الرمادي هما الوحيدين اللي يصلحوا للعمل في أسيا".

وواصل: "مفيش لاعيبة كتير بتلعب في الدول العربية؛ أحنا مصر اللي بتعلم الناس الكورة ورغم كدة تونس والمغرب والجزائر كل مدربينهم بيلعبوا في الدول العربية".

وعن رحيله عن النادي الأهلي قال الحضري: "رحيلي عن الأهلي غلطة وندمان عليها أكيد ومش عيب أني أعترف؛ وأرجع أقول لو كان في حد في الفترة دي ينصحني مكنتش أنا سيبت النادي الأهلي ومشيت.

وأوضح: "الفترة الحالية الناس بتدي نصائح وممكن في الفترة اللي كنت موجود فيها وقبل مني مكانش حد لو سألته على حاجة يديلك إجابة صحيحة؛ مكانش حد يعرف لما مشيت من الأهلي ولا حد خدت رأيه".

وذكر: "في ناس زعلانه منك أكيد وفي ناس بعد سنين السنين هتفضل فاكرالك الموضوع؛ في طفل عنده 8 سنين قالي أنت ليه سيبت الأهلي ومشيت؛ وهو مكانش أتولد أصلا الموقف أحرجني وكان مفاجئ ليا".

ورحل عصام الحضري في أوج تألقه عام 2008 عن النادي الأهلي بشكل مفاجئ لينضم إلى فريق سيون السويسري وهو الرحيل الذي اعتبرته إدارة الأهلي وجماهيره هروبا.