"أمهات مصر" يعلقن علي قرار فتح الحضانات.. ومطالبات بمراعاة ظروف الأم العاملة

طرحت عبير أحمد، مؤسس اتحاد أمهات مصر للنهوض بالتعليم، وائتلاف أولياء أمور المدارس الخاصة، قرار وزارة التضامن بإستمرار العمل بالحضانات وتقليل الكثافة ل50% والغلق حال زيادة إصابات كورونا، للنقاش بين الأمهات لمعرفة آرائهن وتعليقهن عليه.

وتفاعل أولياء الأمور من الأمهات علي صفحة اتحاد أمهات مصر للنهوض بالتعليم، في الفيس بوك، حيث قالت ولي أمر: "مينفعش لازم تتقفل علي الأقل في الشهرين دول في أطفال كتير جالهم ومعني أنهم ينزلوا يعني الفيروس هينتشر أكتر".

وأضافت ولي أمر: "الحقيقه فتح الحضانات في الظروف دي مخاطره كبيره جدا، الأطفال اكثر عرضه للعدوي في الموجه الثانية ، غير أنهم لا يستطيعوا تطبيق الاجراءات الإحترازية، نرجوا غلق الحضانات ولو حتي فتره ذروه تفشي الفيروس"، بينما قالت أخري: "هو للأسف القرار ده اضطرارى علشان الأمهات العاملات وإلا لن يجدوا موظفات في أماكنهم، لابد من وجود تقسيم قوه العمل داخل المصالح وأولويات الأجازه للمرأة العامله الحاضنه".

وذكرت ولي أمر أخري: "أعتقد أن القرار سيكون فى مصلحة الأم العاملة التى لابد من مراعاة ظروفها وأنها مضطره تنزل ابنها الحضانه، يبقى لازم على الأم أنها تتأكد من إن الحضانه عاملة الإجراءات الوقائية المطلوبة وتكون مطمنة  على أولادها، يعنى القرار بإيد الأم، وربنا معانا كلنا".

واستكملت أخري: "معلش أنا كأم ميهمنيش غير صحة ابنى أو بنتى وميهمنيش ساعتها الشغل مع كل احترامى، ربنا كريم"، فردت عليها أخري: "يجب الأخذ فى الإعتبار المرأة العاملة المضطرة تقعد فى البيت عشان أولادها"، وأضافت أخري: "الآولي الحضانات تغلق حفاظا علي صحة الأطفال، أنا قعدت بنتي من الحضانه يعني أخواتها الكبار كلهم قعدين في البيت وأجي أنزل طفله الحضانه".

"لا طبعا حرام دى أطفال ومناعتهم ضعيفة جدا وميستحملوش، اذا كان الكبار مش بتستحمل أى دور برد حاليا وبيقلب كورونا، ما بالك بقى الأطفال اللى بيكحوا فى وش بعض وبيلعبوا مع بعض طبعا غير مقبول"، تستكمل ولي أمر أخري: "أرجو من وزاره التضامن التراجع عن هذا القرار، صحة الأطفال مهمه، حتي لو تم تقليل الكثافه دا بردو هيساعد على انتشار العدوي.