هجوم على تامر عاشور بسبب مريضة سرطان.. والفنان: «ماصدقوا لاقولي غلطة»
نشر الفنان تامر عاشور صورة له عبر صفحته الرسمية على موقع التواصل الاجتماعي "فيس بوك" من أحد مستشفيات أورام الأطفال برفقة طفلة مريضة، وعلق عليها مازحًا: "لا خدي انتي انا صايم يا فاطره.. بحبك".
وكان تعرض عاشور لحملة من الانتقادات على السوشيال ميديا بسبب تلك الصورة، ورغم أن تعليق "عاشور"، على الصورة كان على سبيل الدعابة ولكن رفض عدد من المتابعين طريقة تعليقه على صورة الطفلة المرضية، وتعرض للهجوم من البعض وانهالت التعليقات عليه حيث علق أحد متابعيه قائلًا: "علي فكرة حرام المكتوب فوق على الصورة ده، هو المرض مش مجال للهزار، وهي أو هو مش فاطر أو فاطرة بمزاجها؛ لأنهم بيأخدوا علاج وبيتسحب منهم عينات تحاليل، هزر في أي بوست غير البوست ده"."
وكتب بعض متابعيه تعليقات أخرى مثل: "مانت حلو وبتضحك في الإعلانات وتهزر أومال منكد علينا ليه؟!"، "الله ما أنت بتهزر يا فنان أهو أومال بتنكد على اللي جابونا ليه؟!"، "روح نكد عليهم يا فنان أصلهم ناقصينك".
رد الفنان تامر عاشور
ومن جانبه، رد الفنان تامر عاشور على الانتقادات
التي وجهت له خلال الساعات الماضية بسبب تلك الصورة وعبر صفحته على "فيس
بوك " معلقًا "صباح الخير - أنا طول حياتي
ومشواري عمري ما اتريقت على حد سليم علشان أتريق على مريض حاش لله - واللي أخد كلامي
تريقه على مريض نفوسهم ضعيفة وهم اللي مرضى بيفرقوا بين المريض والشخص الطبيعي".
وأكمل: "لو
نزلت صورتي مع أي طفل "اللي هو غير مُكلف بالصيام" وقولتله بأي طريقة
"متشربش مياه قدامي يا فاطر أو "خد دي يا فاطر أنا صايم" حد
هيتكلم ؟ مستحيل علشان طفل طبيعي".
وتابع "لكن المريض لاااااا منهزرش معاه زي الطبيعي علشان هو مريض ونفضل نقوله مريض مريض مريض ونحسسه بمرضه من تعاملاتنا، المرض الحقيقي هو التفرقة بين أطفالنا اللي بصحة جيدة ربنا يديهم كل الصحة وأطفالنا اللي ربنا اختارهم للمرض، المرض الحقيقي هو أن فكرة " المعايرة" جاتلك قبل 100 فكرة تانية ممكن تجيلك من جمال البنت وضحكها وبهجة الصورة".
وأضاف: "للأسف شوفت كمان حاجة غريبة جدا ناس كتير قوي محسوبين على "هامش هامش هامش المجال الفني" عمرهم ما شافوا مني حاجة وحشة غير أني مباديهمش مواعيد لاقيتلهم تعليقات كأنهم ما صدقوا لاقولي غلطة وأنصحهم "العمر بيجري حاولوا تعملوا حاجة لنفسكم أولى".
واختتم كلامه: "البنت اللي في الصورة فضلت في حضني طول تصوير الإعلان وبحبها جدا جدا، ومتفقين أنا وهي على حاجات كتير قوي قوي هنعملها".
تتر مسلسل ولاد ناس
يشار إلى أن تامر عاشور قدم تتر مسلسل "ولاد ناس" الذي يعرض حاليا ضمن الموسم الدرامي في رمضان.
والأغنية كلمات دعاء عبد الوهاب وألحان تامر عاشور وتوزيع طارق مدكور الذي يعود لتوزيع تترات المسلسلات بعد غياب طويل عن تقديم تترات أعمال درامية.
ومسلسل "ولاد ناس" من إنتاج "سكوير ميديا" للمنتجين منى قطب وإبراهيم حمودة، وتأليف وإخراج هاني كمال، وبطولة نخبة من النجوم، أبرزهم أحمد وفيق، رانيا فريد شوقي، صبري فواز، بيومي فؤاد، إيهاب فهمي، لقاء سويدان، أحمد صيام، صفاء الطوخي، وآخرين.
